बस र ट्रक ठोक्किदा दुबैका चालकसहित ३ जनाको मृत्यु
काठमाडौं । बारामा बस र ट्रक ठोक्किदा ३ जनाको मृत्यु भएको छ । दुर्घटनामा परी २७ जना घाइते भएका छन् । झापाको काँकडभिट्टाबाट काठमाडौं आउँदै गरेको बागमती प्रदेश ३–००१ ख २५८७ नम्बरको बस र हेटौँडाबाट पथलैयातर्फ जाँदै गरेको ना ७ ख ७३०० नम्बरको ट्रक बाराको अमलेखगञ्जस्थित ३ नम्बर पुल नजिक ठोक्किएका हुन् ।
दुर्घटनामा ट्रक चालक तनहुँ घर भएका २८ वर्षीय पूर्ण गुरुङ, बसका चालक मकवानपुरको हेटौँडा घर भएका ४० वर्षीय हरि शमशेर र अर्का एक जना पुरुषको मृत्यु भएको जिल्ला प्रहरी कार्यालय बाराका एसपी सुरेशप्रसाद काफ्लेले बताए ।
दुर्घटनामा सख्त घाइते भएका उनीहरुको हेटौँडा अस्पतालमा उपचारको क्रममा मृत्यु भएको हो । दुर्घटनामा घाइते भएकाहरुको हेटौँडा अस्पताल र पुरानो मेडिकल कलेज चितवनमा उपचार भइरहेको प्रहरीले जानकारी दिएको छ ।
