एनसेल शेयर कारोबारको वैधानिकता सार्वजनिक गर्नुपर्छ : प्रा.डा. गान्धी
काठमाडौं । कानून व्यवसायीले दूरसञ्चार सेवा प्रदायक एनसेलको शेयर खरिदविक्रीको वैधता खोज्नुपर्ने बताएका छन् । वरिष्ठ अधिवक्ता प्राध्यापक डाक्टर गान्धी पण्डितले एनसेलको शेयर खरिदविक्री प्रकरणबारे कानूनी र प्रक्रियागत वैद्यता खोजिनुपर्ने बताएका हुन् । एनसेलको शेयर खरिदविक्री प्रकरणको वास्तविकता र कानूनी पक्षका विषयमा काठमाडौँमा आयोजित एक कार्यक्रममा उनले नेपाल दूरसञ्चार प्राधिकरणले एनसेललाई कारोबारको लेनदेन सम्बन्धमा के कसो भएको हो भनेर चिठ्ठी लेख्नुपर्ने बताए ।
पण्डितले भने, ‘यदि छानबिनबाट अहिले खुलाइएको भन्दा बढी रकममा बेचेर वास्तविकता लुकाइएको भए कारबाहीको घेरामा ल्याउनुपर्छ ।’ एनसेलले कमाएको नाफामा कर तिरे नतिरेको, लगानीकर्तालाई लाभांश वितरण गरे नगरेको र विदेशमा नाफा लिए नलिएकोबारे नियामकलगायत निकायहरू स्पष्ट हुनपर्ने उनको भनाइ छ ।
एनसेलको सेयर खरिदविक्री विद्यमान कानूनी प्रक्रियाभित्र भएको हो वा होइन भनेर सम्बन्धित निकाय स्पष्ट हुनुपर्ने पनि गान्धीले बताए । ‘कुनै पनि कम्पनीले सेयर बेच्न पाउँछ, तर बेच्नु अगाडि नियामक दुरसञ्चार प्राधिकरणसँग स्वीकृत लिनुपर्छ । विदेशी लगानीकर्ताले उद्योग विभागबाट स्वीकृत लिनुपर्छ’, उनले भनेका छन् ।
सन् २०१६ मा एनसेलको तत्कालीन माउ कम्पनी स्वीडेनको टेलियासोनेराले मलेसियन कम्पनी आजियाटा कम्पनीलाई एक खर्ब ४४ अर्ब सात करोड अर्थात् अमेरिकी डलर एक अर्ब ३६ करोड ५० लाखमा बिक्री गरेको थियो । तर, अहिले आजियाटाले स्पेक्ट्रलाइट युके लिमिटेडलाई पाँच करोड अमेरिकी डलर अर्थात् साढे छ अर्बमा बिक्री गरेको विवरण सार्वजनिक गरेको छ ।
निकै कम रकममा भएको यो कारोबारको शंकास्पद देखिन्छ । एनसेलबाट आजियटा कम्पनी निस्केर जाँदा यसले नेपालको वैदेशिक लगानीका क्षेत्रमा पर्न सक्ने विषयबारे पनि वरिष्ठ अधिवक्ता गान्धीले सरकारको ध्यानकार्षण गराए ।
‘अहिले आजियटा निस्केको विषय वैदेशिक लगानी प्रवद्र्धनका हिसाबले पनि गम्भीर छ । उसले सेयर मात्र बेचेर गएन, नेपालमा लगानी गर्ने वातावरण राम्रो छैन, भ्रष्टाचार पेचिलो छ भन्ने आरोपसमेत लगाएको छ । यो नेपालको लागि गम्भीर विषय हो’ उनले भने, ‘नेपालमा लगानीमैत्री वातावरण छ । विदेशी लगानीकर्तालाई निष्पक्ष, स्वतन्त्ररुपमा काम गर्न दिन्छौँ । तर, नेपालको संविधान, कानून मिच्न पाइँदैन भन्ने सन्देश दिन आवश्यक छ ।’
