तीन महिनामा राष्ट्रिय बीमा कम्पनीको मुनाफा झण्डै १४ करोड रुपैयाँ, प्रतिशेयर आम्दानी कति ?
काठमाडौं । सरकारी स्वामित्व रहेको राष्ट्रिय बीमा कम्पनीले चालु आर्थिक वर्षको पहिलो त्रैमासको अपरिष्कृत वित्तिय विवरण सार्वजनिक गरेको छ । सार्वजनिक वित्तीय विवरणले कम्पनीको अधिकांश सूचक बृद्धि भएको देखाएको छ ।
प्रकाशित वित्तीय विवरण अनुसार कम्पनीले चालु आर्थिक वर्षको तीन महिनामा १३ करोड ७६ लाख रुपैयाँ नाफा आर्जन गरेको छ । कम्पनीले गत आर्थिक वर्षको सोही अवधिमा पाँच करोड ३८ लाख रुपैयाँ कमाएको थियो ।
चालु आर्थिक वर्षको असोज महिनासम्ममा कम्पनीको महाविपत्ती कोषमा ४२ करोड ३५ लाख रुपैयाँ, संचिती जगेडा कोषमा तीन अर्ब ४२ करोड र अन्य इक्युटीमा ११ अर्ब रुपैयाँ रहेको प्रकाशित वित्तीय विवरणले देखाएको छ ।
समीक्षा अवधिमा कम्पनीको प्रतिशेयर आम्दानी ५१ रुपैयाँ ६३ पैसा र प्रतिशेयर नेटवर्थ १५४० रुपैयाँ २९ पैसा रहेको छ ।
