नेपाल पुनर्बीमा कम्पनीको वित्तीय विवरण सार्वजनिक, निर्जिवनतर्फको मुनाफा बढ्यो जीवनको घट्यो
नेपाल पुनर्बिमा कम्पनीको दोस्रो त्रैमाससम्मको वित्तीय विवरण सार्वजनिक, निर्जिवनतर्फको खुद मुनाफा बढ्यो जीवनको घट्यो
काठमाडौं ।नेपाल पुनर्बिमा कम्पनीले चालु आर्थिक वर्षको दोस्रो त्रैमाससम्मको वित्तीय विवरण सार्वजनिक गरेको छ । कम्पनीले दोस्रो त्रैमाससम्म आइपुग्दा निर्जीवन बीमा व्यवसायतर्फ खुद नाफा विस्तार गरेको छ भने जीवन बीमातर्फ घटेको कम्पनीको प्रकाशित तथ्यांकले देखाएको छ ।
गत वर्ष ३३ करोड ६१ लाख ८६ हजार रुपैयाँ रहेको निर्जीवन बीमा व्यवसायतर्फको खुद नाफा यो वर्ष ४६ करोड ४५ लाख ४६ हजार रुपैयाँ पुगेको छ । यता, गत वर्ष यसैअवधिमा ४ करोड ४७ लाख ५६ हजार रुपैयाँ नोक्सानमा रहेको जीवन बीमा व्यवसायतर्फको नोक्सानी यो वर्ष अझै बढेर १७ करोड २० लाख ७९ हजार रुपैयाँ पुगेको छ । पुस मसान्तसम्म यस कम्पनीले निर्जीवन व्यवसायबाट १ अर्ब ७९ करोड ८६ लाख ७७ हजार रुपैयाँ खुद बिमा शुल्क आर्जन गरेको छ ।
अघिल्लो वर्षको यसैअवधिमा यसले ४ अर्ब १७ करोड ४० लाख ४२ हजार रुपैयाँ निर्जीवन व्यवसायबाट खुद बीमा शुल्क आर्जन गरेको थियो । त्यस्तै गत वर्ष यसैअवधिमा जीवन बिमा व्यवसायबाट ७८ करोड ४० लाख १८ रुपैयाँ खुद बीमा शुल्क आर्जन गरेकोमा यो वर्ष १ अर्ब ८४ लाख ९६ हजार रुपैयाँमा सीमित भएको छ । यस अवधिसम्म पुनर्बिमा कम्पनीको चुक्ता पुँजी ११ अर्ब ६५ करोड रुपैयाँ रहेको छ ।
पुस मसान्तसम्म यस कम्पनीको निर्जीवन व्यवसायतर्फको जगेडा कोषमा ५ अर्ब ८९ करोड १० लाख ५ हजार रुपैयाँ र जीवन बिमातर्फ २८ करोड ७६ लाख ८७ हजार रुपैयाँ जम्मा भएको छ । निर्जीवन बीमा कोषमा २ अर्ब ५१ करोड ६४ लाख ६१ हजार रुपैयाँ रहेको छ । जीवन बीमा कोषको विवरण भने रिपोर्टमा उल्लेख छैन । दोस्रो त्रैमाससम्म यस कम्पनीको प्रतिसेयर आम्दानी वार्षिक २ रुपैयाँ ५१ पैसा र प्रतिसेयर नेटवर्थ १७४ रुपैयाँ ५४ पैसा रहेको छ ।
