बीमापोष्ट आजबाट तेस्रो वर्षमा, ‘आर्थिक समृद्धिका लागि बीमाको दीगो विकास’ हाम्रो प्रतिबद्धता

‘आर्थिक समृद्धिका लागि बीमाको दीगो विकास’ भन्ने लक्ष्य पछ्याउदै बीमापोष्ट शुभारम्भ गरेको पनि दुई वर्ष पुरा भई तेस्रो वर्षमा लम्किसकेको छ । यो छोटो अवधीमा तपाईहरुबाट प्राप्त विश्वास र मायाले हामीलाई अझै लक्ष्यप्रति प्रतिबद्ध र दृढ हुन मद्दत मिलेको छ ।
स्थापनाको दुई वर्षको अवधीमै हामीलाई विश्वास गरेर पढिदिनुहुने, बीमा सेचतनाको ज्ञान गर्नुहुने बीमित तथा अभिकर्ता, नेपाल सरकार तथा नियामक निकाय अनि बीमा कम्पनीहरुप्रति हृदयदेखि नै आभार व्यक्त गर्दछौं । यस अवधीमा प्रत्यक्ष र अप्रत्यक्ष सहयोग गर्नुहुने सबैमा हृदयदेखि नै धन्यवाद ज्ञापन गर्न चाहन्छौं ।

राईनिसी मिडिया एण्ड रिसर्च सेन्टरले सञ्चालन गरेको बीमापोष्ट डटकम स्थापनाको दुई वर्षे अवधीमा नेपालसहित विश्वभरबाट मासिक १५ लाख हाराहारी पाठक पुर्याउन सफल हुनु हाम्रो लागि गौरवको कुरा हो । तर, यो सबै तपाईहरुले नियमित रुपमा पढिदिनु भएर, सामाजिक सञ्जालमा हुने छलफलमा सहभागी हुनु भएर मात्रै सम्भव भएको हो । युद्धग्रस्त युक्रेनदेखि नेपालसम्मका ति तमाम पाठकहरुलाई नमन गर्न चाहन्छौं । राम्रो लेख्दा माया गर्नुभयो, केही अध्ययन नपुग्दा वा अलिकति दायाँबायाँ जाने वित्तिकै गाली रुपी माया गरेर हामीलाई निरन्तर झकझक्याइरहनु हुने सबैलाई आजको दिनमा हाम्रो विशेष सम्झन चाहन्छौं ।

कोरोना महामारीका बीचमा सुरुवात भई आर्थिक संकटको अवधीसम्म आईपुग्दा बीमापोष्टले अनेकन आरोह–अवरोध र कडा चुनौति मात्रै सामना गरेको छ । तर, हामी आफ्नो कर्तव्यपथमा दृढ यात्राबाट बिचलित भएका छैनौं । कठिन समयका दुई वर्षको यात्रा सिक्न, बुझ्न र लय मिलाउन पर्याप्त होइन । कोरोना महामारी, आर्थिक संकट र यस क्षेत्रमा उत्पन्न नयाँ परिस्थितिले हाम्रा लागि सिक्ने र लय मिलाउने समय दिएन । देश, परिस्थिति र बीमा क्षेत्रमा हाम्रो आवश्यकता र उपस्थितिलाई कठोर रुपमा माग गरिरहेको थियो, जुन हामीले एउटा राष्ट्रिय अर्थतन्त्रको हितमा काम गर्ने र बीमाको दीगो विकास लक्ष्यका लागि संघर्षरत निर्भिक कलमको रुपमा आफ्नो परिचय गराउन सफल भएका छौं ।

विगत दुई वर्षको अवधीमा हामी आम सर्वसाधारण, बीमित, बीमा कम्पनी, नेपाल सरकार र बीमा प्राधिकरणका बीचमा सुचना प्रवाह गर्ने शसक्त माध्यमको रुपमा नेपाली बीमा क्षेत्रमा स्थापित हुन सफल भएकोमा गर्व अनुभूति भएको छ । बीमापोष्ट नेपाली जनसाधारण र बीमितलाई बीमा अभिकर्ता, बीमा कम्पनी र नियामक निकाय नेपाल बीमा प्राधिकरण तथा नेपाल सरकारको बीचमा जोड्ने पुलको भूमिका खेल्न सफल भएको हामीले अनुभूति गरेका छौं ।

देशमा बीमा व्यवसायको प्रबद्र्धन, सम्बद्र्धन, उत्थान, बीमाको दीगो विकास र पुनर्संरचनाका लागि खेलेको भूमिका समग्र बीमा क्षेत्रकै लागि स्मरणयोग्य बन्न पुगेको हामीले ठानेका छौं । राज्यको चौथो अंगको रुपमा हामीले वाचडगको भूमिका निर्वाह गरिरहँदा अनेकौं आरोह–अवरोधहरु पार गर्दै हामी आजको आत्म निर्भर अवस्थामा आइपुगिसकेका छौं ।

बीमाको पहुँच नपुगेका गरिब बस्तीहरुमा बीमाको पहुँच पुर्याउन, बीमा साक्षरता फैलाउन अझै बाँकी छ । हाम्रो अबको लक्ष्य गाउँदेखि सिंहदरवारसम्म बीमाको पहुँच समन्यायिक रुपमा विकास र विस्तार गर्नमा हुनेछ । हाम्रो आगामी यात्रा बीमाको दीगो विकास रणनीतिबाट बिचलित हुनेछैन । देशको वित्तीय क्षेत्रमा सुशासन, भ्रष्टाचारको निरुपण, विधिको शासन र संविधानमा उल्लेख भएको समाजवादी अर्थव्यवस्था निर्माणमा हामी आजको यस ऐतिहासिक दिनमा प्रतिबद्धता व्यक्त गर्न चाहन्छौ । वित्तीय क्षेत्रमा फैलिएको विकृति, कुशासन र मनोमालिन्यलाई चिर्ने क्रममा हामीले निरन्तर तपाईहरु पाठकको साथ खोजिरहनेछौं ।

तेस्रो वर्ष प्रवेशको यस सुखद अवसरमा हाम्रो यात्रामा सघाउनुहुने पाठकबृन्द, विज्ञापनदाता तथा रचनात्मक सुझाव दिनुहुने शुभेच्छुकहरुमा हार्दिक धन्यवाद ज्ञापन गर्दै आगामी दिनमा पनि निरन्तर सहयोगको अपेक्षा गर्दछौं । नेपाली बीमा जगतको मूलधारे सञ्चार माध्यम हुनुको नाताले सबैमा समान व्यवहार, समान प्रतिनिधित्व र पत्रकारिताको आदर्श, मूल्य र मान्यताभित्र रहेर बीमा व्यवसायको दीगो विकास रणनीतिको लागि काम गर्नु हाम्रो मुख्य लक्ष्य हुनेछ । यस अभियानको दौरानमा पाठक, बीमा बिज्ञ, विश्लेषक तथा कम्पनी अनि नियामकका रचनात्मक सुझाव हाम्रा प्रेरणाका रुपमा सदैव ग्रहण गर्दै अघि बढ्ने प्रण गर्दछौं ।

धन्यवाद ।