कैलारी गाउँपालिकामा बीमा सम्बन्धी अन्तरक्रिया कार्यक्रम सम्पन्न, बीमा प्रचारप्रसारको कमी भएको सहभागीको गुनासो

काठमाडौं । नेपाल बीमा प्राधिकरणले कैलाली जिल्लाको कैलारी गाँउपालिकामा बीमा सम्बन्धी जनचेतनामूलक अन्तरक्रिया कार्यक्रम सम्पन्न गरेको छ । प्राधिकरण सुदुर पश्चिम प्रदेश धनगढीबाट उक्त कार्यक्रम सम्पन्न भएको हो ।

सुदुरपश्चिम प्रदेश धनगढीका कार्यालय प्रमुख ओम बहादुर अधिकारिको सभापतित्वमा सम्पन्न उक्त कार्यक्रममा प्रमुख अतिथिका रुपमा कैलारी गाउँपालिकाका अध्यक्ष राज समझ चौधरी, बिशेष अतिथिका रुपमा गाउँ पालिकाकी उपाध्यक्ष भगवती कुमारी चौधरी, अतिथिहरुमा गाउँ पालिकाका प्रमुख प्रशासकीय अधिकृत वीर बहादुर ऐर, वडाध्यक्षहरु, अन्य उपस्थितिहरुमा गाउँ पालिकाका पशुशाखा प्रमुख, कृषि विकास शाखा प्रमुख, कृषि तथा पशुपन्छी बीमाका लागि कैलाली जिल्ला तोकिएका राष्ट्रिय बीमा कम्पनीका शाखा प्रमुख नरेन्द्र पनेरु, जीवन बीमा कम्पनीका शाखा तथा उपशाखाका प्रतिनिधिहरु, स्थानीय अगुवा कृषक, विभिन्न कृषि सहकारी सस्थाका प्रतिनिधिहरु, पत्रकार तथा अन्य कृषकहरु लगायत स्थानीयहरूको १०० भन्दा बढि सहभागिता रहेको थियो ।

उक्त कार्यक्रम नेपाल बीमा प्राधिकरण सुदुर पश्चिम प्रदेश कार्यालयका सहायक निर्देशक दिपक ज्ञवालीले सञ्चालन गरेका थिए । साथै सो कार्यक्रममा सहायक निर्देशक प्रेम हरि पोखरेलले बीमा सम्बन्धि प्रस्तुतिकरण दिएका थिए ।

कार्यक्रममा सहभागीहरुले कृषि बीमा गर्न कहाँ जाने र कोही पनि बीमा गर्न नआएको, बीमा सम्बन्धमा ज्ञान पनि नभएको, जीवन बीमा गरेकोमा ऋण नपाइएको, एउटा बाख्राको बीमा गर्न मिल्ने नमिल्ने, बीमा प्रचार प्रसारको कमिले गर्दा कृषि तथा पशुपन्छी बीमामा संघीय सरकार तथा प्रदेश सरकारले दिएको अनुदान समेत थाहा नभएको जस्ता गुनासो गरेका थिए ।

कार्यक्रममा सहभागीहरूले नेपाल बीमा प्राधिकरण यस प्रदेशमा स्थापना भएकोमा खुशि पनि व्यक्त गरेका थिए । कार्यक्रममा सहभागीहरूले राखेका गुनासाहरुको जबाफ प्रदेश कार्यालयका प्रमुख ओम बहादुर अधिकारीले तथा सम्बन्धित बीमा कम्पनीका प्रतिनिधिहरुले दिएका थिए । उक्त कार्यक्रममा कैलारी गाउँपालिकाका अध्यक्ष राज समझ चौधरीले बीमा प्राधिकरणलाई बीमा सम्बन्धि कार्यक्रम लिएर आउनु भई धेरै कुरा जनाकारी दिएकोमा स्वागत तथा धन्यवाद ज्ञापन गरेका थिए ।

साथै गाउँपालिकाबाट यहाँका कृषक तथा गाउँबासिहरुलाई बीमामा समेट्नका लागि नीति, योजना बनाई लागू गर्ने, बीमा भन्ने कुरा धेरै राम्रो रहेछ यसलाई प्राधिकरण सँग समन्वय गरि बीमालाई अनिवार्य गर्ने कुरा राख्दै यस्तो महत्वपुर्ण कार्यक्रम फेरि पनि यस गाउपालिकामा राख्न अनुरोध गरेका थिए । कार्यक्रममा प्रदेश प्रमुख ओम बहादुर अधिकारिले सहभागीहरूलाई आफ्नो जीवनको पनि बीमा गर्न र सम्पत्तिको पनि बीमा गरि ढुक्क हुन आग्रह गरेका थिए ।

आफुले लिएको बीमा सम्बन्धि ज्ञानलाई आफ्नो परिवार तथा अन्य मानिसहरुलाई पनि जानकारी गराउन अनुरोध गरेका थिए । अन्तमा कार्यक्रम सफल बनाउन सहयोग गर्नुहुने कैलारी गाउँपालिका परिवार, बीमा कम्पनीका प्रतिनिधिहरु, विभिन्न कृषि सहकारी सस्थाका प्रतिनिधिहरु, पत्रकार, बीमा प्राधिकरणका मेरा साथिहरु लगायत सम्पूर्ण सहभागीहरुलाई धन्यवाद दिएका थिए ।