चुनाव जित्दाजित्दै बालेन साहले दिए सन्देश : घोषणापत्र पुरा भएको दिन मात्रै बिजयी उत्सव मनाउँछु

काठमाडौं । वैशाख ३० गते सम्पन्न स्थानीय तहको निर्वाचन पश्चात ९० प्रतिशत भन्दा बढी स्थानीय तहको मत परिणाम सार्वजनि भइकसेको छ । कुल ७५३ स्थानीय तहमा भएको निर्वाचनमा हालसम्म नेपाली काँग्रेसले ३२४ स्थानमा बिजयी हासिल गरेको छ ।

पछिल्लो समय देश नै चुनावीमय बनेको छ । विशेषगरी स्वतन्त्र उम्मेदवारबाट चुनावी मैदानमा उत्रीएकाहरुको पछिल्लो समय चर्चा चलिरहेको छ । काठमाडौं महानगरपालिकाबाट लौरो चुनाव चिन्ह लिएर स्वतन्त्र उम्मेदवारमा उठेका बालेन्द्र साहको लगभग बिजयी निश्चित भइसकेको छ । हालसम्म बालेनले ५५ हजार मत कटाइसकेको छन् । उनले पछिल्लो तथ्याङ्कअनुसार ५५ हजार ७७७ मत प्राप्त गर्दा नेपाली काँग्रेसकी उम्मेदवार सिर्जना श्रेष्ठले ३५ हजार ३७१ मत प्राप्त गरेकी छिन् ।

बालेनले आफ्नो जित लगभग निश्चित भइसकेपछि स्थानीय तहको निर्वाचनमा मत दिने, समर्थन गर्ने र निर्वाचन प्रक्रियामा सामेल हुने सबै मतदाताहरुलाई धन्यवाद दिएको छ । उनले आफ्नो फेसबुक पेजमार्फत् महानगरका मतदाताहरुलाई विश्वास गरेकोमा धन्यवाद प्रकट गर्दै घोषणापत्र पुरा भएको दिन मात्रै बिजयी उत्सव मनाउने बताएका हुन् ।

बालेल साहले फेसबुकमार्फत राखेको स्टाटस
“स्थानीय तह निर्वाचन २०७९ मा हामीलाई मत दिने, समर्थन गर्ने तथा निर्वाचन प्रक्रियामा सामेल हुने सबैलाई धन्यवाद छ । अहिले यति भन्न सकिन्छ कि, हामी काठमाण्डौँ महानगरको जिम्मेवारी बोक्न योग्य छौँ भनेर महानगरका मतदाताहरुले हामीलाई विश्वास गर्नु भएको छ । यहाँ विश्वासको कुरा छ । विश्वासमा जीत वा हार हुदैन ।

जीत–हारलाई मतगणना सकिएसँगै सकिदिउँ । घोषणापत्रमा भएका कुराहरु लागू गर्न सकेका दिन सबै मिलेर विजय उत्सव मनाउँला । तर अहिले विजय जुलुस भनेर अरुलाई पराजित भन्ने संकेतसम्म पनि नगरौँ ।

यसै पनि चुनावमा जित्नेले धेरै मत ल्याउने हो, बहुमत होइन । मेरो स्वयमको पनि बढिमा ३५ प्रतिशत मत आउला । यसको अर्थ हो, बदर मतहरु बाहेक बाँकी ५० प्रतिशत जति मतदाताहरुले अरुलाई छनौट गर्नु भएको छ । हामीलाई मत हाल्ने ३५ प्रतिशतको शिर उँचो पार्दै गर्दा बाँकी ५० प्रतिशतको शिर निहुराउनु पर्ने काम वा संकेत भएको छ कि भन्नेमा ध्यान दिनु पर्छ । र, महानगरको उन्नतिका लागि सबैसँग सहकार्य गर्नु नै पर्छ ।

दोस्रो, ठाउँठाउँबाट र्यालीका लागि काठमाण्डौँ आउने कुराहरु एकदमै धेरै सुनिरहेका छौँ । हाम्रो अनुरोध के हुन्छ भने तपाईहरु कोही पनि र्यालीका लागि काठमाण्डौँ आउने दुख गर्नु पर्दैन । यो अभियान सबैको हो । यसको स्वामित्व हरेक नेपालीले जहाँबाट जसरी पनि लिइदिए हामी खुसी हुनेछौँ ।

अभियानको अहिलेसम्मको सफलताका लागि खुशीयाली प्रकट गर्ने नै हो भने पनि तपाई रहेकै क्षेत्रमा ’धन्यवाद र्याली’ गर्नु होला । त्यसले सो स्थानमा बढि प्रभाव छोड्छ । नेपालमा बालेन मात्रैको यो अभियान होइन, यो नेपालभरको अभियान हो भन्ने सन्देश जान्छ । ’बालेन’हरुका लागि देशभरका नागरिक साथसाथै रहन्छन् भन्ने देखिन्छ । यहाँ पनि यस्तो किसिमको चेतना र अभिमत रहेछ भनेर प्रोत्साहन हुनेछ ।

अबको बाटो सहज छैन । हाम्रो अभियानको वास्तविक परिक्षा अब सुरु हुनेछ । हामीले हिड्ने सहि बाटो, चाल्ने उपयुक्त कदम र गर्ने अधिकतम सत्प्रयासहरुले हाम्रो अभियान र महानगरको उन्नतिलाई प्रभाव पार्नेछ ।

हामीलाई साथ र सुझाब जति महत्वपुर्ण छ, उति नै खाँचो पर्नेछ खबरदारीको । हामीले बाटो बिराउन लाग्यौँ भने खबरदारी गर्नुहोला । अनि हाम्रो अभियानको उर्जाको लागि हामी सँधै तपाईहरुसँग जोडिरहेका हुन्छौँ । तपाईहरुको उपस्थिति र साथको आवश्यकता महसुस हुने बित्तिकै हामी आवाज दिनेछौँ ।

अहिलेलाई यो अभियानलाई देशव्यापी बनाउने प्रयास गरौँ । हरेक टोलटोल र गाउँगाउँमा ’बालेन’हरु भेटिउन् जसले केवल जनमतका आधारमा परिवर्तनको जिम्मेवारी बोक्न सकुन्, अवसर पाउन सकुन् ।
अबको हाम्रो पहिलो यात्रा काठमाडौको मुहार फेर्नलाई हुनेछ । मिलेर अगाडी बढौँ ।“