ज्योति लाइफको ब्राण्ड एम्बेसडरमा महानायक राजेश हमालको निरन्तरता
काठमाडौं । ज्योति लाइफ इन्स्योरेन्सको ब्राण्ड एम्बेसडरको रुपमा महानायक राजेश हमाल पुनः नियुक्त भएका छन् । कम्पनीले यसअघि पनि राजेश हमाललाई नै ब्राण्ड एम्बेसडरको रुपमा चयन गरेको थियो ।
कम्पनीको स्थापना कालदेखि नै कम्पनीको ब्राण्ड एम्बेसडरको रुपमा रहेका महानायक हमाल र ज्योति लाइफ इन्स्योरेन्सबीच वैशाख २२ गते सम्झौता नविकरण गरिएको हो ।
उक्त नविकरण सम्झौतापत्रमा ज्योति लाइफ इन्स्योरेन्सका प्रमुख कार्यकारी अधिकृत (सिइओ) प्रकाश बिक्रम खत्री र महानायक राजेश हमालले संयुक्त रुपमा हस्ताक्षर गरेका हुन् । यस सम्झौतापश्चात ब्राण्ड एम्बेसडर महानायक हमालले ज्योति लाइफ इन्स्योरेन्सका सेवाहरुको प्रचारात्मक कार्य, ब्राण्ड प्रबर्द्धन तथा ब्राण्ड संरक्षण सम्बन्धि कार्यहरुमा निरन्तरता दिनेछन् ।
ज्योति लाइफ इन्स्योरेन्सका सिइओ खत्रीले प्रेरणाको स्रोत, भरोसायोग्य, अग्रणी तथा सरलताले भरिएका अभिनेता महानायकसँगको सहकार्यले ज्योति लाइफको प्रबर्दन गर्न थप सहयोग पुग्ने बताए ।
साथै महानायक हमालले ज्योति लाइफको ब्राण्ड एम्बेसडरमा निरन्तरता दिन पाउँदा खुसी लागेको र कम्पनीको प्रगतिमा राम्रो भूमिका निर्वाह गर्ने प्रतिबद्धता ब्यक्त गरे ।
