सूर्यादय र वोमी लघुवित्तको एकीकृत कारोबार सुरु
काठमाडौं । वोमी लघुवित्त वित्तीय संस्था लिमिटेड र सूर्याेदय लघुवित्त वित्तीय संस्था लिमिटेडले एकीकृत कारोबार आजदेखि शुरु गरेको छ ।
यी दुई लघुवित्तबीच एकआपसमा गाभ्ने।गाभिने कायार्थ नेपाल राष्ट्र बैंकले फागुन ५ गते तथा कम्पनी रजिष्ट्रारको कार्यालयबाट चैत १ गतेको पत्रमार्फत स्वीकृति प्रदान गरिएपश्चात् संयुक्त मर्जर समितिको निर्णयअनुसार चैत १९ गतेदेखि एकीकृत कारोबार गर्ने भनिएकोमा सो दिन शनिबार परेको कारण आजदेखि यी दुई लघुवित्तले एकीकृत कारोबार सुरु गरेको हो ।
दुई लघुवित्त एकआपसमा गाभिएपछि ‘सूर्योदय वोमी लघुवित्त वित्तीय संस्था लिमिटेड’को नामबाट एकीकृत कारोबार सुरु भएको छ ।
दुवै कम्पनीको गत पुस १६ गते सम्पन्न छुट्टाछुट्टै वार्षिक साधारण सभाले मर्जर सम्बन्धी प्रस्ताव पारित गरेको थियो । एकीकृत कारोबारका लागि नेपाल राष्ट्र बैंक र कम्पनी रजिष्ट्रारको कार्यालयले स्वीकृति दिएसँगै आगामी चैत १९ गतेदेखि एकीकृत कारोबार शुरु हुन लागेको हो ।
यी दुई कम्पनी १ बराबर १ शेयर आदानप्रदान गर्ने गरी मर्जरमा गएका हुन् । मर्जर पश्चात उक्त कम्पनीको रजिष्टर्ड कार्यालय बनेपा नगरपालिका वार्ड नम्बर १३, साँगामा रहने जानकारी दिइएको छ ।
वोमी लघुवित्तको चुक्तापूँजी ४१ करोड १९ लाख रुपैयाँ र सूर्योदय लघुवित्तको २४ करोड ८० लाख रुपैयाँ रहेको छ । एक आपसमा मर्जरपछि कम्पनीको चुक्तापूँजी ६५ करोड ९९ लाख रुपैयाँभन्दा बढी पुग्नेछ ।
त्यस्तै, दुवै कम्पनी बीच गत भदौ १५ गते एक आपसमा मर्जरमा जाने सम्बन्धी प्रारम्भिक सम्झौता भएको थियो । मर्जर सम्बन्धी समझदारी पत्रमा हस्ताक्षर भएसँगै भदौ १६ गतेदेखि ती कम्पनीको दोस्रो बजारमा शेयर कारोबार रोक्का रहेको छ ।
