नेपाल टेलिकमको ४० प्रतिशत लाभांश दिने निर्णय, चैत २४ मा डाक्यो साधारण सभा
काठमाडौं । नेपाल दूरसंचार कम्पनी लिमिटेड (एनटिसि)ले गत आर्थिक वर्षको मुनाफाबाट लाभांश घोषणा गरेको छ । कम्पनीले आव २०७७।०७८ को संचित मुनाफाबाट शेयरधनीहरुलाई ४० प्रतिशत लाभांश दिने निर्णय गरेको हो ।
सोही लाभांश पारित गर्न कम्पनीले चैत २४ गते साधारण सभा आह्वान गरेको छ । कम्पनीको फागुन ३० गते बसेको संचालक समितिको बैठकले सभा चैत २४ गते त्रिभुवन आर्मी अफिसर्स क्लब, टुँडिखेल, काठमाडौंमा बिहान ११ बजे बस्ने निर्णय गरेको हो ।
उक्त सभाले गत आर्थिक बर्षको मुनाफाबाट आफ्ना शेयरधनीहरुलाई प्रस्ताव गरेको कायम चुक्तापूँजीको २० प्रतिशत बोनस शेयर र कर प्रयोजनका लागि २० प्रतिशत नगद लाभांँश गरी कुल ४० प्रतिशत लाभांश पारित गर्नेछ ।
साथै सोही सभाले आव २०७७।०७८ को वार्षिक प्रतिवेदन उपर छलफल गरी पारित गर्ने, सोही आवको वासलात, नाफा नोक्सान हिसाब, नगद प्रवाह विवरण तथा अन्य अनुसूचीहरु उपरल छलफल गरी पारित गर्नेछ ।
त्यस्तै, आव २०७८।०७९ को लागि लेखापरीक्षक नियुक्त गर्ने र निजको पारिश्रमिक निर्धारण गर्ने सभाको एजेण्डा रहेको छ ।
कम्पनीले साधारण सभा प्रयोजनार्थ र लाभांश वितरणका लागि चैत ११ गतेदेखि चैत २३ गेतसम्म बुकक्लोज गर्ने निर्णय गरेको छ । यसअनुसार चैत १० गतेसम्म कायम शेयरधनीहरुमात्र सभामा उपस्थित हुन र नेप्सेमा कारोबार भई कायम रहेका शेयरधनीले मात्र प्रस्तावित लाभांश पाउनेछन् ।
