दुई लघुवित्तको लाभांश सुरक्षित गर्ने भोलि अन्तिम मौका
काठमाठौं । दुई लघुवित्तको लाभांश सुरक्षित गर्ने भोलि अन्तिम दिन रहेको छ । आशा लघुवित्त वित्तीय संस्था र स्वरोजगार लघुवित्त वित्तीय संस्था लिमिटेडको लाभांश सुरक्षित गर्ने बिहिबार अन्तिम मौका रहेको छ ।
यी दुवै लघुवित्तले साधारण सभा प्रयोजन र लाभांश वितरण प्रयोजनका लागि कात्तिक १२ गते बुकक्लोज गर्ने भएसँगै भोलि बिहिबारसम्म कायम शेयरधनीले मात्र सभामा भाग लिई लाभांश प्राप्त गर्नेछन् ।
स्वरोजगार लघुवित्त वित्तीय संस्थाले आर्थिक वर्ष २०७७।०७८ को मुनाफाबाट शेयरधनीहरुलाई २५ प्रतिशत लाभांश र आशा लघुवित्तले शेयरधनीलाई २५ प्रतिशत बोनस शेयर र १.३१ प्रतिशत नगद लाभांश कर प्रयोजनको लागि गरी कुल २६.३१ प्रतिशतल लाभांश वितरण गर्न लागेको हो ।
सोही प्रतिशत लाभांश प्रस्ताव पारित गर्न स्वरोजगार लघुवित्तले आगामी कात्तिक २७ गते नेपाल प्रज्ञान प्रतिष्ठान कमलादीमा बिहान ११ बजे साधारण सभा बोलाएको छ ।
त्यस्तै आशा लघुवित्तले उक्त प्रतिशत लाभांश प्रस्ताव पारित गर्न कात्तिक २७ गते होटल फल एण्ड ट्राउट भिलेज एण्ड रेष्टुरेन्ट ककनी, नुवाकोटमा बिहान १० बजे साधारण सभा आह्वान गरेको छ ।
