९ महिनामा अभिकर्ताहरुले बुझे ११ अर्ब रुपैयाँ कमिशन,  बीमा अभिकर्ताको आम्दानीमा ५३ प्रतिशतले बृद्धि

काठमाडौं । नेपाल सञ्चालित १९ वटा जीवन बीमा कम्पनीहरुमा कार्यरत एक लाख भन्दा बढि सक्रिय अभिकर्ताहरुले चालु आर्थिक वर्षको ९ महिनामा ११ अर्ब रुपैयाँ भन्दा बढि कमिशन बुझेका छन् ।

कम्पनीहरुले प्रकाशन गरेको वित्तीय विवरण अनुसार चालु आवको चैत्र मसान्तसम्ममा कूल ११ अर्ब १४ करोड ३६ लाख ५६ हजार रुपैयाँ कमिशन बापत बुझेका हुन् । गत आर्थिक वर्षमा जम्मा सात अर्ब २६ करोड ८४ लाख ३८ हजार रुपैयाँ कमिशन बुझेका अभिकर्ताहरुले यस वर्ष आफ्नो आम्दानी ५३.३ प्रतिशतले बृद्धि गर्न सफल भएका छन् ।

चालु आवको नौ महिनामा सबैभन्दा धेरै अभिकर्तालाई कमिशन वितरण गर्नेमा नेपाल लाईफ इन्स्योरेन्स कम्पनी रहेको छ । सो कम्पनीले दुई अर्ब ८४ करोड ७६ लाख १६ हजार रुपैयाँ आफ्ना अभिकर्ताहरुलाई कमिशन वितरण गरेको छ । दोस्रोमा एआईसी नेपाल छ । सो कम्पनीले एक अर्ब ४० करोड ९० लाख ३३ हजार रुपैयाँ कमिशन बापत अभिकर्तालाई वितरण गरेको छ । उल्लेखित दुई कम्पनीका अभिकर्ता कमिशन क्रमशः ३०.६ र २९.५ प्रतिशतले बृद्धि भएको छ ।

त्यस्तै, नेशनल लाइफ इन्स्योरेन्स कम्पनीले ९७ करोड ३० लाख ६३ हजार रुपैयाँ कमिशन वितरण गरेकोछ । सो कम्पनीको अभिकर्ता कमिशन ६५.२ प्रतिशतले बृद्धि भएको छ । युनियन लाइफ इन्स्योरेन्स कम्पनीको अभिकर्ता कमिशन ९६ करोड४९ लाख ६७ हजार रुपैयाँ रहेको छ । सो कम्पनीको अभिकर्ता कमिशन ५६.९ प्रतिशतले बृद्धि भएको छ । एशिन लाइफले ५६ करोड, सिटिजन र गुराँस लाइफले ४५ करोड, मेट लाइफले ४० करोड, सूर्या लाइफले ३६ करोड, आइएई लाइफले ३५ करोड, प्राइम र ज्योति लाइफले ३४ करोड रुपैयाँ अभिकर्तालाई कमिशन वितरण गरेका छन् ।

सबैभन्दा थोरै कमिशन दिनेमा महालक्ष्मी लाइफ र प्रभु लाइफ छ । उक्त दुई कम्पनीले क्रमशः १५ र १७ करोड रुपैयाँ कमिशन वितरण गरेका छन् । त्यस्तै सरकारी लगानीको राष्ट्रिय बीमा संस्थानले २० करोड रुपैयाँ अभिकर्तालाई कमिशन बापत वितरण गरेको छ । सन नेपाल र सानिमा लाइफले २५ करोड रुपैयाँ, रिलायन्स लाइफले ३० करोड र रिलायबल नेपाल लाइफले ३३ करोड रुपैयाँ आफ्ना अभिकर्ताहरुलाई कमिशन बापत वितरण गरेको छ ।

अभिकर्ताले पाउने कमिशन बीमा व्यवसायमा भर पर्ने हुँदा कमिशन कम र बढी बीमा व्यवसायको आधारमा हुने गर्दछ । अभिकर्ता कमिशनको बृद्धिको आधारमा बीमा व्यवसाय बृद्धि भएको रुपमा लिन सकिन्छ ।

सबैभन्दा धेरै गुराँस लाइफ इन्स्योरेन्स कम्पनीका अभिकर्ताले आम्दानी बृद्धि गरेका छन् । सो कम्पनीको अभिकर्ता कमिशन १६२ प्रतिशतले बृद्धि भएको छ भने महालक्ष्मी लाइफ इन्स्योरेन्स कम्पनीका अभिकर्ताले पाएको कमिशन १४७.१ प्रतिशतले बृद्धि भएको छ । त्यस्तै, सानिमा लाइफका अभिकर्ता कमिशन १२२.९ प्रतिशत र सिटिजन लाइफका अभिकर्ताको कमिशन १०९ प्रतिशतले बृद्धि भएको छ ।